अर्थ चाैतारी
धरान। स्थानीय प्रो शुक्रबहादुर राईले सूर्य नेपाल इस्टर्न ओपन २०२१ को उपाधि जितेका छन्। राईले उपाधिसहित १ लाख ३५ हजार रुपैयाँ जितेका छन्।
धरान गल्फ क्लबमा सोमबारदेखि सुरु भएको प्रतियोगिताको तेस्रो दिन शुक्रले १ ओभर ६१ स्कोर जोड्दै समग्रमा ५ स्ट्रोकको अग्रता लिएर उपाधि जितेका हुन्। शुक्रले समग्रमा १ अन्डर २ सय ९ स्कोर जोड्दै एमेच्योर सुभाष तामाङलाई पछि पारे।
सुभाषले अन्तिम दिन २ अन्डर ६८ को प्रदर्शन गर्दै एमेच्योरतर्फ पहिलो र समग्रमा दोस्रो स्थान हासिल गरे। एमेच्योरतर्फ दोस्रो स्थान युवराज भुजेल (२२३) र तेस्रो स्थान सद्भाव आचार्य (२२७) ले हासिल गरे।
व्यावसायिकतर्फ दोस्रो स्थानमा धरानकै बलभद्र राई रहे। उनले समग्रमा ७ ओभर २१७ स्कोरका साथ ८८ हजार रुपैयाँ जिते। तेस्रो स्थानमा ९ ओभर २१९ स्कोर जोडेका निरज तामाङले ६५ हजार रुपैयाँ हात पारे। चौथो स्थानमा सञ्जय लामाले १० ओभर २२० स्कोरसाथ ५३ हजार ५ सय रुपैयाँ प्राप्त गरे।
सुरुआती दुई दिनमा ३६ होलको खेलपछि २२ व्यावसायिक र ६ एमेच्योर खेलाडीले अन्तिम दिनको लागि कट बनाएका थिए। प्रतियोगिताको कुल पुरस्कार राशि ७ लाख ७५ हजार रुपैयाँ रहेको थियो।
विजेता खेलाडीलाई धरान उपमहानगरपालिकाका मेयर तिलक राई, नेपाल पुलिसका एआईजी हरि पाल, सूर्य नेपालका सहायक ब्रान्ड म्यानेजर नवीन सरोज र धरान गल्फ क्लबका अध्यक्ष विरेन्द्र विक्रम लिम्बुले पुरस्कृत गरे।
कट बनाउने शीर्ष २१ व्यावसायिक खेलाडीले नगद पुरस्कार प्राप्त गरेका थिए। प्रतियोगिताअन्तर्गत शुक्रबार व्यावसायिक र एमेच्योर खेलाडी सम्मिलित प्रो–एम इभेन्ट हुनेछ।
अर्थ चाैतारी ।
