काठमाडौं । आयात निर्यात कारोबारका हिसाबले देशकै मुख्य नाका वीरगञ्जबाट चालू आर्थिक वर्ष (आव) २०७८/७९ को ८ महीनामा वैदेशिक व्यापार उल्लेख्य बढेको छ। वीरगञ्ज भन्सार कार्यालयको तथ्यांकअनुसार अघिल्लो आव २०७७/७८ को समीक्षा अवधिको तुलनामा यो वर्ष वैदेशिक व्यापारमा ६० प्रतिशतले वृद्धि भएको हो।
चालू आवको साउनदेखि फागुनसम्ममा यो नाकाबाट ५ खर्ब ३९ अर्ब रुपैयाँ बराबरको मालसामान भित्रिएको छ। गत आवको सोही अवधिमा ३ खर्ब ३१ अर्ब रुपैयाँको आयात भएको थियो। आयात बढेर वैदेशिक विनिमयमा दबाब परेपछि सरकारले आयातमा कडाइ गरेको छ। सो अवधिमा ४ खर्ब ६३ अर्ब रुपैयाँबराबरको मालसामान आयात हुँदा निर्यात भने ६६ अर्ब रुपैयाँको मात्र भएको भन्सारको तथ्यांक छ। वीरगञ्ज नाकाबाट आयात हुने मुख्य वस्तुमा पेट्रोलियम पदार्थ, सवारीसाधन र औद्योगिक कच्चा पदार्थ छन् ।
नेपालका लागि आयात हुने पेट्रोलियम पदार्थको अधिकांश परिमाण यही नाकाबाट भित्रिन्छ । निकासीतर्फ प्रशोधित खानेतेल, जुस, कपडा, जुत्तालगायत वस्तु मुख्य रहेको छ । आयात र निर्यातको तुलना गर्दा यो नाकाको वैदेशिक व्यापारबाट मात्रै करीब ४ खर्ब रुपैयाँ व्यापार घाटा देखिन्छ । यो गत आवको समीक्षा अवधिको तुलनामा ४३ प्रतिशतले बढी हो।
