काठमाण्डौं । नेपाल दूरसञ्चार प्राधिकरणले नेपालमा फाइभजी प्रयोगका लागि आवश्यक क्षेत्र पहिचान गर्न परामर्शदाता नियुक्ति गर्ने भएको छ ।

फाइभजीको सम्भावित क्षेत्र पहिचान तथा फाइभजी विस्तार गर्ने कार्यक्रमको गुरु योजना तयार गर्नेगरी प्राधिकरणले परामर्शदाता आह्वान गरेको थियो । आह्वान मध्ये पहिलो चरणमा चार कम्पनी छनोट भएका छन । प्राधिकरणले एक सूचना जारी गर्दै परामर्श सेवा प्रदायक कम्पनीहरूसँग आशय पत्रको माग गरेको थियो । आशयपत्र बुझाउने मध्येबाट पहिलो चरणमा चार कम्पनी छनोट भएका हुन् ।

छनोट हुनेमा टेलि ग्लोब सोलुसन प्रालि, जेभी ट्यानजेन्ट कन्सल्ट्यान्ट ग्रुप, इन्क्लुसिभ एभ्रेस्ट र एभरेस्ट टेलिकम एण्ड आईटीको जेभी, महारुद्र एक्ज्युकेटिभ र महारुद्र ग्रुपको जेभी रहेका छन् । छनोट भएका यी चार कम्पनीबाट आएको आर्थिक तथा प्राविधिक प्रस्तावको आधारमा अन्तिममा एक कम्पनी छनोट हुनेछ । छनोट हुने कम्पनीले विभिन्न क्षेत्रमा फाइभजी प्रयोग बढाउन तथा फाइभजीका लागि आवश्यक गुरुयोजना तयार गर्ने काम गर्नेछ ।