काठमाण्डौ । सौर्य ऊर्जा उत्पादकहरूको संस्था नेपाल (सोपान) ले विद्युत् प्राधिकरणको विद्युत् खरिदबिक्री सम्झौता (पीपीए) बाट डेडिकेटड र ट्रंक लाइनको बक्यौता उठाउने निर्णयमा आपत्ति जनाएको छ । १२ गते प्राधिकरणले पत्र पठाइ डेडिकेटेड र ट्रंकलाइनको बक्यौता नतिरेका उद्योगी सञ्चालक रहेका जलविद्युत् तथा सौर्य ऊर्जा उत्पादकबाट पीपीए बमोजिम रकम कटौती गर्ने जनाएको थियो । सोपानले यसमा आपत्ति जनाएको छ ।

प्राधिकरणको उक्त पत्र पीपीए सम्झौता विपरीत रहेको उल्लेख गर्दै सोपानले भनेको छ, ‘केवल सेयरधनीको आधारमा एउटा कम्पनीले भुक्तान गर्नुपर्ने रकमको दायित्व विल्कुलै स्वतन्त्र अस्तित्व रहेको अर्को कम्पनीलाई बहन गराउने कार्य कम्पनी कानुनको स्थापित सिद्धान्त विपरीत समेत छ ।’

ऊर्जा कम्पनीको कयौँ सर्वसाधारणको समेत लगानी रहेको हुँदा प्राधिकरणले पत्र पठाएअनुसार कदम चाले सम्पूर्ण सेयरधनीको हक अधिकारमा समेत गम्भीर आघात पर्ने सोपानले जनाएको छ । त्यसरी बक्यौता असुल गरे प्रशस्त विदेशी लगानी ऊर्जा क्षेत्रमा नकारात्मक असर पर्ने सोपानको भनाइ छ ।