काठमाण्डौ । पाटन उच्च अदालतले विशाल बजार कम्पनीको बुधबार हुन लागेको साधारण सभा रोक्न अन्तरिम आदेश दिएको छ । उच्च अदालतका न्यायाधीशद्वय ठंकप्रसाद गुरूङ र ऋषी राजभण्डारीको संयुक्त इजलासले फागुन २८ गतेका लागि तोकिएको साधारण सभा रोक्न आदेश दिएको हो ।

विशाल बजार कम्पनीका शेयरधनी सुनिल कुमार शाक्यसहित ११ जना शेयरधनीले साधारण सभा लगानीकर्ताको हित र कानुन विपरीत भएको दाबी गर्दै पाटन उच्च अदालतमा मुद्दा दायर गरेका थिए । उक्त मुद्दामा निवेदकले माग गरेअनुसार हुनु नपर्ने भए १५ दिनभित्र कारण खुलाउन समेत उच्च अदालतले आदेश जारी गरेको छ ।

यसअघि कम्पनीले माघ २९ गते सूचना जारी गर्दै साधारण सभा आह्वान गरेको थियो । कम्पनीले २०७१/७२ देखि २०७५/७६ सम्मको विवरण पारित गर्ने तथा शेयरधनीलाई १४ प्रतिशत अन्तरिम लाभांश दिने प्रस्तावसहित साधारण सभा बोलाएको थियो । शेयर बजारकै सबैभन्दा धेरै बजार पुँजीकरण भएको सो कम्पनीले विगत १० आर्थिक वर्षदेखि साधारण सभा गर्न सकेको छैन ।