काठमाण्डौ । आर्थिक वर्ष २०८१/८२ मा नेपाल सरकारले आन्तरिक र बाह्य ऋणसहित कुल २६खर्ब ६९ अर्ब ६५ करोड ऋण तिर्न बाँकी रहेको नेपाल राष्ट्र बैंकको प्रतिवेदनले देखाएको छ । असार मसान्तसम्मको तथ्याङ्कअनुसार यसमध्ये बाह्य ऋण १४खर्ब १ अर्ब ४२ करोड र आन्तरिक ऋण १२ खर्ब ६८ अर्ब २२ करोड छ ।

राष्ट्र बैंकले आइतबार सार्वजनिक गरेको प्रतिवेदनअनुसार अघिल्लो वर्ष कुल सार्वजनिक ऋण गार्हस्थ्य उत्पादन (जीडीपी) को ४२.७१ प्रतिशत थियो भने चालु आर्थिक वर्षमा यो बढेर ४३.७१ प्रतिशत पुगेको छ । आन्तरिक ऋणतर्फ सरकारले चालु वर्षमा रु. ३२९ अर्ब ९९ करोड परिचालन गरेको छ भने रु. २४३ अर्ब ९१ करोड साँवा भुक्तानी गरेको छ । यसरी यस अवधिमा रु. ८६ अर्ब ८ करोड खुद आन्तरिक ऋण परिचालन भएको हो, जुन कुल गार्हस्थ्य उत्पादनको १.४ प्रतिशत बराबर हो ।

त्यस्तै, सरकारले चालु वर्षमा रु. १२५ अर्ब ४० करोड बाह्य ऋण परिचालन गरेको छ ।नेपाल राष्ट्र बैंकको तथ्याङ्कअनुसार २०८२ असार मसान्तमा नेपाल सरकार, प्रदेश र स्थानीय तहका विभिन्न खातामा जम्मा रु. १३० अर्ब ७३ करोड नगद मौज्दात रहेको छ । अघिल्लो वर्षको सोही अवधिमा यो मौज्दात रु. ९३ अर्ब ९६ करोड मात्र थियो ।