काठमाण्डौ । यातायात व्यवस्था विभागले सवारी चालक अनुमति पत्र प्राप्त गर्नका लागि अनलाइन फर्म भरेका सेवाग्राहीलाई विभागको आधिकारिक फेसबुकमा प्रकाशित हुने अनुमतिपत्रको विवरण(नाम लिस्ट) हेरेर मात्रै सम्पर्कमा आउन आग्रह गरेको छ ।

विभागले बिहीबार सार्वजनिक सूचना प्रकाशित गर्दै यस्तो आग्रह गरेको हो । विभागले अनलाइन फर्म भरेका सेवाग्राहीको अनुमतिपत्र सुरक्षण मुद्रण केन्द्रबाट छपाई सम्पन्न भइसकेपछि छपाई भएको सेवाग्राहीको नाम लिस्ट विभागको आधिकारिक फेसबुक पेज(हेल्लो यातायात व्यवस्था विभाग) प्रकाशित गर्ने व्यवस्था मिलाएको जनाएको छ ।

यो लिस्टमा नाम भएका सेवाग्राहीले सक्कल राजस्व रसिद(नवीकरण र वर्ग थपको हकमा पुरानो सवारीचालक अनुमतिपत्र) लिएर विभागमा उपस्थित हुन आग्रह गरिएको छ ।

जेनजी आन्दोलन अघिसम्म छपाई भइसकेको सेवाग्राहीको हकमा ७२ घण्टाभित्र सम्पर्कमा आउन मोवाइलमा म्यासेज उपलब्ध गराउने व्यवस्था थियो । आन्दोलनको क्रममा सूचना प्रणाली तोडफोड र आगजनी भएका कारण अहिले त्यो प्रणाली अवरुद्ध छ।