काठमाण्डौ । अबदेखि सेयर बजारमा सूचीकृत कम्पनीहरूले बोनस सेयर वितरण गर्दा त्यसको कर रकम पनि कम्पनीले नै व्यवस्था गर्नुपर्ने भएको छ।
धितोपत्र बोर्डले ‘धितोपत्र निष्कासन तथा बाँडफाँट निर्देशिका, २०७४’ मा संशोधन गर्दै अबदेखि कुनै पनि सूचीकृत कम्पनीले सेयरधनीलाई बोनस सेयर वितरण गर्नु अघि कर प्रयोजनका लागि आवश्यक रकम स्वयं कम्पनीले नै व्यवस्था गर्नुपर्ने बाध्यकारी प्रावधान लागू गरेको छ।
बोर्डले जारी गरेको दशौँ संशोधन अनुसार, बोनस सेयर प्रदान गर्दा लाग्ने कर रकम कम्पनीले लाभांशबाटै कट्टा गरी निस्पट्ट मिलान गर्नुपर्नेछ। यो संशोधनअघि बोनस सेयर घोषणा भए पनि धितोपत्रधनीले अर्कै किसिमले कर तिरेपछि मात्र बोनस सेयर डिम्याट खातामा पाउने समस्या देखिँदै आएको थियो।
अब भने कम्पनीले करको व्यवस्था नगरी बोनस सेयर बाँड्न नपाउने भएकाले लगानीकर्ताले कर नतिरेकै बोनस सेयर पाउने, झन्झट कम हुने र प्रक्रिया स्पष्ट हुने बोर्डले विश्वास व्यक्त गरेको छ।
नयाँ नियमअनुसार कम्पनीले—
बोनस सेयर घोषणाकै क्रममा करका लागि आवश्यक रकम लाभांशबाट छुट्याउनुपर्नेछ,
कर मिलाएपछि बाँकी लाभांश लगानीकर्ताको खातामा अनिवार्य राखिदिनुपर्नेछ।
बोर्डका अनुसार यसले लगानीकर्ताको सुरक्षा बढ्नेछ र बोनस सेयर वितरणसम्बन्धी प्रक्रियामा एकरूपता आउनेछ।
अर्थ चौतारी ।
