काठमाण्डौ । सवारी साधनको नक्कली लिखत तयार गरी सरकारी अभिलेख सच्याएको र भ्रष्टाचार गरेको आरोप लागेका बब्लु अलि अन्सारीलाई विशेष अदालतले १ लाख रुपैयाँ धरौटीमा छाड्ने आदेश दिएको छ ।

विशेष अदालतका अध्यक्ष सुदर्शनदेव भट्ट तथा सदस्यहरू हेमन्त रावल र विदुर कोइरालाको इजलासले अन्सारीलाई १ लाख रुपैयाँ नगद धरौटी वा सो बराबरको बैंक जमानत लिई तारिखमा राखेर मुद्दाको पुर्पक्ष गर्न आदेश दिएको हो ।

अदालतमा बयान दिने क्रममा प्रतिवादी अन्सारीले आफूले कुनै पनि गलत कार्य नगरेको र कसैको मिलेमतोमा नरहेको भन्दै आरोपको इन्कार गरेका थिए । तर, प्रहरीको अनुसन्धान प्रतिवेदन, बरामद गरिएका दशी प्रमाणहरू, कल डिटेल रेकर्ड र डिजिटल फरेन्सिक ल्याबको रिपोर्टका आधारमा तत्काल प्राप्त प्रमाणहरूबाट उनी दोषी देखिन सक्ने अवस्था रहेको अदालतले उल्लेख गरेको छ ।

अन्सारीमाथि राष्ट्रसेवक कर्मचारीहरूसँगको मिलेमतोमा नेपाल सरकार र सार्वजनिक निकायलाई प्राप्त हुने भन्सार महसुल लगायतका राजस्वमा हानि पुऱ्याउने बदनियत राखेको आरोप छ ।

उनले यातायात व्यवस्था कार्यालय नेपालगन्ज र एकान्तकुनाका सवारी दर्ता सम्बन्धी कागजात, सवारी धनीको विवरण, इन्जिन र चेसिस नम्बर, भन्सारका प्रज्ञापनपत्र लगायतका सरकारी अभिलेखहरूमा अनधिकृत रूपमा फेरबदल, केरमेट र थपघट गरी नक्कली लिखत तयार पारेको दाबी गरिएको थियो ।