काठमाण्डौ । भारतका लागि पोल्याण्ड गणतन्त्रका कार्यवाहक राजदूत डा. पियोटर आन्तोनी श्विताल्स्कीले नेपालका लागि पोल्याण्डका मानार्थ वाणिज्यदूत जनरल लोकमान्य गोल्छालाई पोल्याण्ड गणतन्त्रको ‘अर्डर अफ मेरिट’ को अफिसर क्रस प्रदान गरेका छन् । काठमाण्डौमा आयोजित कार्यक्रममा मानार्थ वाणिज्यदूत गोल्छालाई पोल्याण्ड गणतन्त्रको ‘अर्डर अफ मेरिट’ को अफिसर क्रस प्रदान गरिएको हो ।

पोल्याण्ड गणतन्त्रको नेपालमा स्थायी दूतावास नरहेकाले नेपालका लागि कूटनीतिक प्रतिनिधित्व तथा वाणिज्यदूत सेवाहरू भारतको नयाँ दिल्लीस्थित पोल्याण्ड दूतावासमार्फत सञ्चालन हुँदै आएको छ । यस हैसियतमा उक्त दूतावासले नेपालमा रहेका पोलिश नागरिकहरूलाई आवश्यक सहयोग प्रदान गर्नुका साथै नेपाल–पोल्याण्डबीचको सहकार्य र आपसी सम्बन्ध प्रवर्द्धन गर्दै आएको छ ।

यो सम्मान पोल्याण्डले विदेशी नागरिकलाई प्रदान गर्ने उच्चतम नागरिक सम्मानहरूमध्ये एक हो । विशिष्ट अतिथि तथा कूटनीतिक समुदायका सदस्यहरूको उपस्थितिमा सम्पन्न उक्त समारोहमा पोल्याण्ड गणतन्त्रको अर्डर अफ मेरिट पोल्याण्ड राज्यप्रति सेवा पुर्याएका तथा अन्तर्राष्ट्रिय सहकार्य र आपसी समझदारीलाई उल्लेखनीय रूपमा सुदृढ बनाएका व्यक्तिहरूलाई प्रदान गरिने सम्मान भएको उल्लेख गरिएको थियो ।

यसअघि सन् २०१५ मा नेपालमा आएको विनाशकारी भूकम्पका समयमा पुर्याएको उल्लेखनीय योगदानको कदरस्वरूप पोल्याण्ड गणतन्त्रका राष्ट्रपति आन्द्रेज दुदाद्वारा लोकमान्य गोल्छालाई नाइट्स क्रस अफ द अर्डर अफ मेरिट प्रदान गरिएको थियो ।

हाल प्रदान गरिएको अफिसर क्रस अफ द अर्डर अफ मेरिट गोल्छाले कोभिड–१९ महामारीको कठिन समयमा देखाएको उत्कृष्ट नेतृत्व, साथै वर्षौंदेखि नेपालमा रहेका पोलिश नागरिकहरूलाई निरन्तर रूपमा प्रदान गर्दै आएको सहयोग, सहकार्य र सेवाको मूल्याङ्कनस्वरूप प्रदान गरिएको हो ।

आफ्नो सम्बोधनमा कार्यबाहक राजदूत डा. श्विताल्स्कीले गोल्छाको दीर्घकालीन प्रतिवद्धता, नेपाल–पोल्याण्डबीचको सहकार्य प्रवर्द्धनमा पुर्याएको योगदान तथा जनस्तरको सम्बन्ध सुदृढ गर्न खेलेको भूमिकाको प्रशंसा गरे । उनले यस्ता प्रयासहरूले दुई देशबीचको मैत्रीपूर्ण सम्बन्धलाई थप गहिरो बनाएको उल्लेख गरेका छन् ।

सम्मान ग्रहण गर्दै गोल्छाले यो सम्मानलाई नेपाल र पोल्याण्डबीचको साझा मूल्य, आपसी सम्मान तथा दीर्घकालीन मित्रताको प्रतीकका रूपमा व्याख्या गरे ।