काठमाण्डौ । नेपाल आयल निगमले डिजेल, मट्टीतेल र हवाई इन्धनको मूल्यमा भारी वृद्धि गरेको छ । तर, आम उपभोक्ताको ढाड सेक्ने गरी मूल्य बढाउँदा पनि निगमको घाटा भने कम नहुने देखिएको छ । बिहीबारदेखि लागू हुने नयाँ मूल्य समायोजनपछि पनि निगमले आगामी १५ दिनमा करिब पौने ६ अर्ब रुपैयाँ घाटा हुने भएको छ ।

निगमले बुधबार एक विज्ञप्ति जारी गर्दै वैशाख ३ गते बिहीबार मध्यरात १२ बजेदेखि लागू हुने गरी नयाँ मूल्य तोकेको हो । नयाँ मूल्यसूची अनुसार डिजेल र मट्टीतेलको मूल्य प्रतिलिटर ३० रुपैयाँले बढाइएको छ भने पेट्रोलको मूल्य भने यथावत् राखिएको छ। यसै गरी, आन्तरिकतर्फको हवाई इन्धनको मूल्यमा प्रतिलिटर ५ रुपैयाँ वृद्धि गरिएको छ ।

नयाँ समायोजनपछि पहिलो वर्गका क्षेत्रमा डिजेल र मट्टीतेलको खुद्रा बिक्री मूल्य प्रतिलिटर २३४ रुपैयाँ ५० पैसा कायम भएको छ। त्यस्तै, दोस्रो वर्गका क्षेत्रमा २३६ रुपैयाँ र तेस्रो वर्गका क्षेत्रमा २३७ रुपैयाँ प्रतिलिटर पुगेको छ। हवाई इन्धन (आन्तरिकतर्फ) को मूल्य पनि प्रतिलिटर २५१ रुपैयाँबाट बढेर २५६ रुपैयाँ पुगेको निगमले जनाएको छ ।

निगमका अनुसार, यो मूल्य समायोजनपछि पनि डिजेलमा मात्रै प्रतिलिटर ९९ रुपैयाँ १६ पैसा घाटा छ ।

निगमले मूल्य वृद्धिको कारण अन्तर्राष्ट्रिय बजारमा कच्चा तेलको भाउ बढ्नुलाई देखाएको छ । मध्यपूर्वमा जारी द्वन्द्वका कारण अन्तर्राष्ट्रिय बजारमा पेट्रोलियम पदार्थको मूल्य निरन्तर उकालो लागेको र इन्डियन आयल कर्पोरेसन (आईओसी) बाट १५ अप्रिलमा प्राप्त नयाँ खरिद मूल्यसूची पनि बढेर आएकाले मूल्य समायोजन गर्न बाध्य भएको निगमले आफ्नो विज्ञप्तिमा उल्लेख गरेको छ ।