काठमाण्डौ । सम्पत्ति शुद्धीकरणको कसुरमा हिरासतमा रहेका व्यवसायी सुलभ अग्रवाललाई हिरासतमा ‘सुविधा’ दिएको आशङ्कामा छानबिन थालिएको छ ।

ललितपुर प्रहरीको हिरासतमा रहेका अग्रवालको साथमा आइप्याड फेला परेपछि उपत्यका प्रहरी कार्यालयले त्यसबारे छानबिन थालेको हो । डिआइजी ओम अधिकारीको नेतृत्वमा छानबिन समिति गठन गरिएको उपत्यका प्रहरी कार्यालयका एक जना अधिकृतले रातोपाटीलाई बताए ।

अधिकारीको नेतृत्वमा ५ जनाको समितिले जेठ १ गते शुक्रबारदेखी त्यसबारे छानबिन गरिरहेको छ । सम्पत्ति शुद्धीकरण अनुसन्धान विभागले पक्राउ गरेर अग्रवाललाई जावलाखेल स्थित जिल्ला प्रहरी परिसरको हिरासतमा राखेको थियो । जिल्ला प्रहरी परिसरले नै आइप्याड बरामद गरेर उपत्यका प्रहरी कार्यालयलाई जिम्मा लगाएको छानबिन समितिका एक जना सदस्यले रातोपाटीलाई बताए । समितिले हिरासतको सुरक्षा जिम्मेवारीमा खटिएका प्रहरी कर्मचारीहरुसँग त्यसबारे सोधपुछ गरिरहेको छ ।

त्यसबारे उपत्यका प्रहरी कार्यालयमा अग्रवाललाई अन्य थुनुवा भन्दा फरक कोठामा बस्ने सुविधा दिएको भनेर उजुरी परेको छ । छानबिन सुरु भएपछि विभागले उनलाई अस्पताल भर्ना गरेको छ ।

सम्पत्ति शुद्धीकरणमा अनुसन्धान भइरहेको अर्का आरोपी दीपक भट्टलाई प्रहरी वृत्त बौद्धको हिरासतमा राखिएको छ । हिमालयन रि इन्स्योरेन्समार्फत रकम हिनामिना गरी शुद्धीकरण गरेको कसुरमा विभागले दुवै जनामाथि अनुसन्धान गरिरहेको छ ।

शंकर ग्रुपका सञ्चालक अग्रवाललाई चैत २२ मा विभागले नियन्त्रणमा लिएको थियो । व्यवसायी दीपक भट्टलाई सीआईबीले चैत १९ मा पक्राउ गरेर विभागको जिम्मा लगाएको थियो ।