काठमाडौं । जबर्जस्ती करणीको आरोप लागेका नायक पल शाहले आज तनहुँ प्रहरीमा गिरफ्तारी दिने भएका छन् । उनी प्रहरीको निगरानीमै तनहुँ पुगिसकेको स्रोतले बतायो ।

शाहले आज फेसबुकबाट आफैं प्रहरीमा उपस्थित हुने घोषणा गरेका थिए । यद्यपि, कुन प्रहरीमा भन्ने खुलाएका थिएनन् । उनीमाथि तनहुँ जिप्रकामा जाहेरी परेका कारण त्यहीँ गिरफ्तारी दिन इच्छा देखाएपछि प्रहरीले ‘कन्सिडर’ गरेको स्रोतको भनाइ छ । स्रोतका अनुसार उनले तनहुँबाटै सो स्टाटस पोष्ट गरेका थिए ।

‘काठमाडौंमा गिरफ्तारी दिँदा युट्यूवरले तमासा गर्ने भएकाले पनि उहाँ तनहुँ जानुभएको हो,’ स्रोतले भन्यो । प्रहरीले पललाई नियन्त्रणमा लिइसकेको बताएको छैन । तर, उनलाई प्रहरीको निगरानीमा नै तनुहुँको दमौली पुर्‍याइएको स्रोतको भनाइ छ । उनी करिब एक घण्टामा जिप्रका तनहुँ पुग्ने स्रोतको दाबी छ । एक नाबालिग गायिकाले चार दिनअघि दमौली प्रहरीमा जाहेरी दिएयता पल फरार थिए । उनलाई पक्राउ गर्ने काठमाडौंमा प्रहरीका पाँच टोली खटाइए पनि फेला परेका थिएनन् ।