काठमाण्डौ । इन्धनको मूल्य घटेसँगै सबै गन्तव्यको हवाई भाडा सस्तिएको छ । नेपाल आयल निगमले विहीबार (१७ पुस)देखि लागू हुने गरी आन्तरिक हवाई इन्धनमा प्रतिलिटर ६ रुपैयाँले घटाएपछि आन्तरिक वायुसेवा कम्पनीहरुले पनि काठमाडौं र बाहिरबाट उडान हुने सबै गन्तव्यको हवाई भाडा घटाएका छन् ।
नेपाल नागरिक उड्डयन प्राधिकरणले आन्तरिक वायुसेवालाई शुक्रबार (१८ पुस)देखि नै लागू हुने गरी इन्धनको शुल्क घटाउन निर्देशन दिएको छ । प्राधिकरणको निर्देशनपछि इन्धनको शुल्क घट्दा यात्रुले हवाई भाडासँगै तिर्ने टिकेटको मूल्य पनि सस्तो पर्ने भएको छ ।
इन्धनको मूल्य घटेका कारण काठमाण्डौ विमानस्थल केन्द्रित भएर हुने उडान अवतरणमा सबैभन्दा बढी धनगढीको भाडा घटेको छ । यो गन्तव्यमा २६५ रुपैयाँले भाडा घटेको छ । हाल ५९ सय २० रुपैयाँ काठमाण्डौ धनगढी गन्तव्यको हवाई इन्धनको शुल्क रहेकोमा अब ५६ सय ५५ रुपैयाँ हुने भएको छ । यो शुल्कसँगै यो गन्तव्यको भाडामा २६५ ले सस्तिएको हो ।
काठमाण्डौबाट हुने उडान अर्थात ट्रङ्क रुटको हवाई भाडामा माउन्टेन २१०, भन्द्रपुर १८०, विराटनगर १४०, जनकपुर ७५, भरतपुर ६५, पोखरा ९५ र भैरहवाको १२५ रुपैयाँले इन्धनको शुल्क घटेको छ । यस्तै नेपालगन्ज १९५, तुम्लिङटार ११०, सिमरा ५५, सुर्खेत २१० र राजविराजको १२५ रुपैयाँले इन्धको शुल्क घटेको हो ।
अर्थ चाैतारी ।
