एजेन्सी । चिनियाँ विद्युतीय सवारीसाधन निर्माता बीवाईडीले जुन ९ मा भारतमा आफ्नो पहिलो प्लग–इन हाइब्रिड एसयूभी सार्वजनिक गर्दै एउटा महत्त्वपूर्ण कोशेढुंगा पार गर्ने तयारी गरेको छ । कम्पनीले आधिकारिक रूपमा मोडल वा सार्वजनिक गर्ने रणनीतिको पुष्टि नगरेको भए पनि प्रारम्भिक टिजरहरूले यो बीवाईडीको अझै विकास हुँदै गरेको प्रिमियम पीएचईभी खण्डमा प्रवेश हुन सक्ने संकेत गर्छन् ।

बीवाईडीले आफ्नो सामाजिक सञ्जाल च्यानलहरूमार्फत भारतमा आफ्नो डीएम–आई सुपर प्लग–इन हाइब्रिड ईभी पावरट्रेन भित्र्याउने संकेत दिएको छ । यस प्रविधिले पेट्रोल इन्जिनलाई विद्युतीय मोटर र ब्याट्री प्याकसँग मिलाउँछ । लामो रेन्ज र सुधारिएको इन्धन दक्षता प्रदान गर्नु यसको उद्देश्य हो ।

आगामी कार्यक्रम औपचारिक सार्वजनिक (लोन्च) हुनेछ वा प्रदर्शनी मात्र हुनेछ भन्ने कुरा स्पष्ट नभए पनि बीवाईडीको सन्देशले भारतमा आफ्नो वर्तमान विद्युतीय–मात्र पोर्टफोलियोभन्दा बाहिर विस्तार गर्ने बलियो मनसाय देखाउँछ । प्रिमियम ईभी उत्पादनका लागि परिचित यस ब्रान्डले परम्परागत आन्तरिक दहन इन्जिन भएका सवारीसाधन र पूर्ण विद्युतीय गतिशीलता बीचको पुलको रूपमा प्लग–इन हाइब्रिडहरूको सम्भावनाको मूल्यांकन गरिरहेको देखिन्छ ।

अनुमानअनुसार दुईवटा सम्भावित मोडलहरू हुन सक्छन्ः बीवाईडी सिलायन ६ डीएम–आई र बीवाईडी एट्टो २ डीएम–आई । दुवै एसयूभीहरू भारतीय सडकमा परीक्षणका क्रममा देखिएका छन् । यसले यी मोडलहरू बजारका लागि विचारधीन रहेको संकेत गर्छ । बीवाईडी एट्टो २ डीएम–आई निकै प्रतिस्पर्धात्मक मध्यम आकारको एसयूभी खण्डमा रहने अपेक्षा गरिएको छ । यसले आकारका हिसाबले ह्युन्डाई क्रेटा र किया सेल्टोस जस्ता मोडलहरूसँग प्रतिस्पर्धा गर्नेछ ।

यो १.५–लिटरको न्याचुरल्ली एस्पिरेटेड पेट्रोल इन्जिनद्वारा सञ्चालित छ जसमा ७.८ किलोवाट आवर वा १८ किलोवाट आवरको ब्याट्री प्याक जडान गरिएको हुन्छ । यसको संयुक्त ड्राइभिङ रेन्ज क्रमशः ९२८ किलोमिटर र ९९८ किलोमिटरसम्म हुने दाबी गरिएको छ । यसमा शुद्ध विद्युतीय रेन्ज ४० किलोमिटर र ९० किलोमिटरसम्म हुनेछ ।

अर्कोतर्फ, बीवाईडी सिलियन ६ डीएम–आई ठूलो आकारको एसयूभी हो । यसको आकार टोयोटा फर्चुनरसँग तुलना गर्न सकिन्छ । यसमा पनि १.५–लिटरको पेट्रोल इन्जिन प्रयोग गरिएको छ तर यसले न्याचुरल्ली एस्पिरेटेड र टर्बोचार्ज्ड दुवै कन्फिगरेशनहरू प्रदान गर्छ । यसको हाइब्रिड प्रणाली १८.३ किलोवाट आवर र २६.६ किलोवाट आवरका ठूला ब्याट्री प्याकहरूसँग जोडिएको छ ।

न्याचुरल्ली एस्पिरेटेड संस्करणले फ्रन्ट–ह्विल–ड्राइभ लेआउटका साथ २१८ बीएचपी उत्पादन गर्ने अपेक्षा गरिएको छ जबकि टर्बोचार्ज्ड भेरियन्टले ३४४ बीएचपीसम्म शक्ति प्रदान गर्न सक्छ र यसमा अल–ह्विल ड्राइभ सुविधा हुनेछ । उल्लेखनीय कुरा के छ भने, सिलियन ६ डीएम–आईले १ हजार ९२ किलोमिटरसम्मको संयुक्त रेन्ज र १४० किलोमिटरसम्मको शुद्ध विद्युतीय रेन्जको प्रतिज्ञा गर्छ ।

बीवाईडीको आगामी डेब्यूले भारतको प्लग–इन हाइब्रिड खण्डलाई आकार दिन महत्त्वपूर्ण भूमिका खेल्न सक्छ । यो हाल छनौट र प्रयोग दुवैमा सीमित छ । कम्पनीले एउटा वा दुवै मोडलहरू ल्याए पनि यस कदमले विद्युतीकरण गरिएका उत्पादनहरूलाई विविधीकरण गर्ने र चार्जिङ पूर्वाधारमा पूर्ण रूपमा निर्भर नभई लामो रेन्ज खोज्ने खरीददारहरूलाई आकर्षित गर्ने बृहत्तर रणनीतिको संकेत गर्छ ।