काठमाण्डौ । निजी क्षेत्रका व्यवसायीहरूको छाता संस्था नेपाल उद्योग वाणिज्य महासंघ (एफएनसीसीआई)को ६०औं वार्षिक साधारण सभाबाट चयन हुने नयाँ कार्यसमितिका लागि उम्मेदवारी घोषणा सुरु भएकाे छ ।
महासंघको आगामी चैत २८ र २९ गते हुने वार्षिक साधारण सभासँगै नयाँ कार्यसमिति चयन हुनेछ । विधानअनुसार हालका वरिष्ठ उपाध्यक्ष अञ्जन श्रेष्ठ स्वतः अध्यक्ष बन्नेछन् भने अन्य पदहरूमा चुनावी प्रतिस्पर्धा हुनेछ ।
साेमबार हेमराज ढकाल समूहबाट उम्मेदवारी घोषणा गर्ने कार्यक्रम तय गरेको छ । वरिष्ठ उपाध्यक्ष ढकाल हुने गरी अन्य पदमा उम्मेदवारी घोषणा गरिनेछ ।
हाल वस्तुगततर्फका उपाध्यक्ष रहेका ढकालको प्यानलबाट एसोसिएट उपाध्यक्ष पदमा ज्योत्सना श्रेष्ठले पुनः उम्मेदवारी दिने तयारी गरेकी छन् । त्यसैगरी जिल्ला-नगर उपाध्यक्ष पदमा उमेश डालमिया र कल्पना गैरे उम्मेदवार बन्ने भएका छन् । महासंघको संशोधित विधानअनुसार यसपटकदेखि दुई जना जिल्ला-नगर उपाध्यक्ष रहने व्यवस्था गरिएको छ ।
यस्तै, ढकाल समूहबाट वस्तुगत उपाध्यक्षमा नरेशलाल श्रेष्ठ र महिला उपाध्यक्ष पदमा कमला श्रेष्ठलाई उम्मेदवार बनाउने तयारी गरिएको छ । प्यानलको औपचारिक घोषणा सोमबार गरिने जनाइएको छ ।
अर्थ चाैतारी ।
