काठमाण्डौ । कुशल भुर्तेलको उत्कृष्ट ब्याटिङ प्रदर्शनमा घरेलु मैदानमा यूएईलाई पराजित गर्दै नेपाली राष्ट्रिय क्रिकेट टोलीले दुई खेलको सिरिज बराबरी गरेको छ ।

मंगलबार सम्पन्न खेलमा नेपालले यूएईलाई ८ विकेटले पराजित गर्दै सिरिज १-१ को बराबरीमा ल्याएको हो। पहिलो खेलमा सोमबार डीएल मेथडमार्फत नेपाल ६ विकेटले पराजित भएको थियो ।

दुई खेलको सिरिजअन्तर्गत पहिलो खेलमा बलिङ र ब्याटिङ दुवैमा अपेक्षाकृत प्रदर्शन गर्न नसकेको नेपाली टोलीले दोस्रो खेलमा भने समग्रमा उत्कृष्ट प्रदर्शन गरेको छ । यस खेलमा नेपालले बलिङ र ब्याटिङ दुवैतर्फ सन्तुलित र प्रभावशाली प्रदर्शन गर्दै सहज जित निकालेको हो ।

यूएईले दिएको १२९ रनको लक्ष्य नेपालले १५.५ ओभरमै मात्र २ विकेटको क्षतिमा पूरा गर्यो । नेपालका ओपनर कुशल भुर्तेलले अविजित ८४ रनको विस्फोटक इनिङ खेले भने कप्तान दीपेन्द्रसिंह ऐरी २३ रनमा अविजित रहे । भुर्तेलको आक्रामक ब्याटिङ र कप्तान ऐरीको साथले नेपाललाई सहज जित दिलाउन महत्वपूर्ण भूमिका खेलेको हो ।