काठमाण्डौ । सांग्रिला डेभलपमेन्ट बैंक लिमिटेडले गत आर्थिक वर्ष २०८२/८३ को चौथो त्रैमासमा व्यावसायिक सूचकहरूमा उल्लेख्य सुधार गर्दै खुद नाफामा ४६.६९ प्रतिशतको वृद्धि दर्ता गरेको छ । बैंकले सार्वजनिक गरेको अपरिष्कृत वित्तीय विवरण अनुसार गत असार मसान्तसम्ममा ८८ करोड ९९ लाख ३७ हजार रुपैयाँ खुद नाफा आर्जन गरेको हो । अघिल्लो आर्थिक वर्षको सोही अवधिमा बैंकको नाफा ६० करोड ६६ लाख ७१ हजार रुपैयाँ मात्र रहेको थाहा भएको छ ।

समीक्षा अवधिमा बैंकको खुद ब्याज आम्दानी १६ प्रतिशतले बढेर २ अर्ब ४२ करोड रुपैयाँ पुगेको छ, जुन अघिल्लो वर्ष २ अर्ब ७ करोड रुपैयाँ थियो । बैंकको सञ्चालन मुनाफामा पनि आकर्षक सुधार आई ८८ करोड ४४ लाखबाट १ अर्ब ३५ करोड ३० लाख रुपैयाँ पुगेको छ । व्यवसाय विस्तारसँगै बैंकको खुद शुल्क तथा कमिसन आम्दानी २५ करोड ७२ लाख र कुल सञ्चालन आम्दानी २ अर्ब ९५ करोड २७ लाख रुपैयाँ कायम भएको छ । नाफामा आएको बढोत्तरीसँगै बैंकको प्रतिसेयर आम्दानी (ईपीएस) पनि १७.०६ रुपैयाँबाट बलियो सुधार हुँदै २३.८३ रुपैयाँ पुगेको छ ।

आर्थिक वर्षको अन्त्यसम्ममा बैंकको वितरणयोग्य नाफा ४९ करोड २३ लाख रुपैयाँ पुगेकाले सेयरधनीहरूलाई दिन सक्ने लाभांश क्षमता १३.१९ प्रतिशत पुगेको छ । अघिल्लो वर्ष यस्तो क्षमता १०.३६ प्रतिशत मात्र थियो । ३ अर्ब ७३ करोड ४० लाख रुपैयाँ चुक्ता पुँजी भएको बैंकको जगेडा कोषमा २ अर्ब १० करोड २६ लाख रुपैयाँ सञ्चित छ भने प्रतिसेयर नेटवर्थ १६९.५० रुपैयाँ र मूल्य आम्दानी अनुपात (पीई रेसियो) १६.९५ गुणा रहेको छ ।

बैंकले निक्षेप संकलन र कर्जा प्रवाहमा पनि सन्तुलित वृद्धि गरेको छ । गत असारसम्म बैंकले निक्षेप ४ प्रतिशत (२ अर्ब २६ करोड) ले बढाएर ५६ अर्ब ९२ करोड रुपैयाँ पुर्‍याएको छ भने कर्जा लगानी ७ प्रतिशत (३ अर्ब ५ करोड) ले वृद्धि गर्दै ४५ अर्ब ७८ करोड रुपैयाँ पुर्‍याएको छ । तर, व्यवसायका मुख्य सूचकहरू सकारात्मक रहँदा रहँदै पनि बैंकको सम्पत्तिको गुणस्तरमा भने दबाब देखिएको छ । अघिल्लो वर्ष ५.५२ प्रतिशत रहेको खराब कर्जा (एनपीएल) समीक्षा वर्षमा बढेर ६.८७ प्रतिशत पुगेकाले आगामी दिनमा जोखिम व्यवस्थापनमा बैंकले थप सजगता अपनाउनुपर्ने देखिन्छ ।