काठमाण्डौ । एनसेल फाउन्डेसनले ‘सीप मेला २०८२’ को लागि काठमाण्डौ महानगरपालिकासँग साझेदारी गरेको छ। सीप विकासअन्तर्गत काठमाण्डौ महानगरपालिकाले आयोजना गरेको यो सबैभन्दा ठूलो सीप विकास कार्यक्रम हो।
कार्यक्रमअन्तर्गत, व्यावहारिक र रोजगारीमुखी सीपमा तालिम दिइने लक्ष्य लिइएको छ, जसले सहभागिहरुको रोजगारी सम्भावना वृद्धि गर्दै दिगो जीविकोपार्जनमा सहयोग पुऱ्याउने फाउन्डेसनले जनाएको छ। काठमाण्डौ महानगरपालिकाद्वारा जेठ २१ गते काठमाण्डौको टुंडिखेलमा सम्झौता पत्र हस्ताक्षर कार्यक्रममाझ काठमाण्डौ महानगरपालिका र एनसेलबीच सम्झौतापत्रमा हस्ताक्षर तथा आदानप्रदान गरिएको हो।
काठमाण्डौ महानगरपालिकातर्फबाट सीप मेला २०८२ कार्यान्वयन समितिका संयोजक शैलेन्द्र झा र गतिशील अभियान नेपालका तर्फबाट अध्यक्ष रामजी प्रसाद पौडेलले सम्झौता पत्रमा हस्ताक्षर गरेका छन् भने एनसेलको तर्फबाट एनसेल फाउन्डेसन एन्ड स्पेसल प्रोजेक्ट डाइरेक्टर विशाखा लक्ष्मी खड्का र कर्पोरेट एन्ड रेगुलेटरी अफेयर्स डाईरेक्टर डिल्लीराम श्रेष्ठले सम्झौतामा हस्ताक्षर गरेका छन्।
“एनसेल फाउन्डेसनमा हामी सीप अभिवृद्धि नै रोजगारीको सम्भावना बढाउने र दिगो जीविकोपार्जनको आधार निर्माण गर्ने प्रमुख उपाय हो भन्ने विश्वास गर्छौं। सीप मेलामा काठमाण्डौ महानगरपालिकासँगको सहकार्यबाट युवाहरुलाई व्यावहारिक सीपहरू प्रदान गरी आजको परिवर्तनशील रोजगारी बजारमा सफल हुन सघाउने विश्वास लिएका छौँ”, खड्काले भनिन्।
जेठ ७ गतेदेखि सुरु भएको सीप मेलामा हाल १० क्षेत्रमा आधारित ३७ पेसामा २ हजार ४२४ जनालाई सीप तालिम प्रदान गरिरहेको छ। यसमा आईसीटी क्षेत्रमा साइबर सेक्युरिटी, मल्टिमिडिया, डट नेट, जाभा, पीएचपी र ग्राफिक्स, डिजिटल मार्केटिङ, ड्रोन, रोबोटिक्स, फाइबर अब्टिक्स टेक्निसियन, कृतिम बौद्धिकता (एआई) र यसको प्रयोग (एआई एन्ड इट्स एप्लिकेसन) गरी १२ पेसा छन्। ब्युटिसियन (सौन्दर्य) क्षेत्रमा विक्स (कृतिम कपाल बनाउने) सौन्दर्यकर्मी, मेकअप एण्ड हेयर, नेल टेक्निसियन, कपाल काट्ने (बार्बर) पेसा छन्।
विशेष क्षमता सहयोगी तालिम (स्पेसल एबिलिटी सपोर्ट स्किल) यस वर्ष थपिएको क्षेत्र हो। यसअन्तर्गत हाउस किपिङ् र केयर सर्भिस गरी २ वटा पेशाका तालिम चलिरहेका छन्। हाउस किपिङ् बहिरा अपाङ्गता भएका बालबालिकाका सहजकर्ताका लागि हो भने केयर सर्भिस डाउन सिन्ड्रोम, अटिजम भएका बालबालिकाहरुको सहजकर्ताका लागि हो। इलेक्ट्रिक्समा ल्यापटप रिपेयर टेक्निसियन, एसी एण्ड रेफ्रिजेरेटर, सिसिटिभी रिपेयरिङ्, मोबाइल रिपेयरिङ् गरी ४ वटा पेशाका तालिम सञ्चालित छन्।
गार्मेन्ट्समा गार्मेन्ट फेब्रिकेटर र बेसिक फेसन डिजाइनिङ् गरी २ वटा पेशाका तालिम छन्। कन्स्ट्रक्सनमा इलेक्ट्रिसियन, प्लम्बिङ्, मेसन, वेल्डिङ् र कार्पेन्ट्री गरी ५ पेशाका तालिम छन्। हस्पिटालिटीमा बारिस्ता, वेटर, फास्ट फुड र वेकरी गरी ४ पेशाका तालिम छन्। अटोमोवाइल्समा इलेक्ट्रिक भेहिकल (इभी) मेन्टिनेन्स, हलुका सवारी साधन उपकरण मर्मत (लाइट भेहिकल मेसिन), विद्युतीय र इन्धनबाट चल्ने मोटरसाइकल र स्कुटर मर्मत गरी ३ वटा पेशाका तालिम सञ्चालित छन्। आर्ट एण्ड स्कप्चरमा थाङ्का, सेरामिक्स (टेराकोटा) गरी २ वटा पेशाका तालिम चलिरहेका छन्। यसै विधामा ज्योतिष र पुरोहितको पनि तालिम चलिरहेका छन्।
कृषिमा फूलको सजावट (फ्लावर डेकोरेसन) सम्बन्धी तालिम चलेका छन्। यस्तै स्टक मार्केटसम्बन्धी तालिम चलिरहेको छ।
एनसेल फाउन्डेसन र काठमाण्डौ महानगरपालिकाबीचको यो सहकार्यले युवाहरूक लागि समावेशी अवसरहरू सिर्जना गर्ने तथा रोजगारीयोग्य सीप विकासमार्फत दिगो विकासमा योगदान दिने फाउन्डेसनको अपेक्षा छ।
अर्थ चाैतारी ।
