काठमाण्डौ । नेपाल राष्ट्र बैंकले कुमारी बैंक लिमिटेड र प्राइम कमर्सियल बैंक लिमिटेडलाई निर्देशन उल्लङ्घन गरेको भन्दै सचेत गराएको छ।
राष्ट्र बैंकका अनुसार, दुबै बैंकले बैंक तथा वित्तीय संस्थासम्बन्धी ऐन र एकीकृत निर्देशन व्यवस्थाको पूर्ण पालना नगरेको पाइएको हो।
कुमारी बैंकले राष्ट्र बैंकको निर्देशनअनुसारका कानुनी प्रावधानहरू पालना नगरेको कारण सचेत गरिएको हो। त्यस्तै, प्राइम कमर्सियल बैंकले कर्जा वर्गीकरणमा त्रुटि गरेको पाइएको छ।
राष्ट्र बैंकले बताएको छ कि प्राइम बैंकले कर्जाको भाखा नाघेको अवधिका आधारमा वर्गीकरण नगरेको, साथै क्यापिटल एडिक्वेसी फ्रेमवर्क–२०१५ अनुसार जोखिम भार गणना नगरेको पाइएको छ।
यस कारण, राष्ट्र बैंक ऐन, २०५८ को दफा १०० (२) (९क०) बमोजिम प्राइम बैंकका प्रमुख कार्यकारी अधिकृत (CEO) लाई समेत सचेत गराइएको हो।
राष्ट्र बैंकले दुबै बैंकलाई भविष्यमा निर्देशन पालना सुनिश्चित गर्न र नियमनअनुसार आचरण सुधार गर्न निर्देशन दिएको छ।
अर्थ चौतारी ।
