सुर्खेत । कर्णाली प्रदेशमा रहेका यातायात कार्यालयहरूले चालु आर्थिक वर्षको ९ महिनामा २५ करोड बढी राजस्व सङ्कलन गरेका छन् । चैत्र मसान्तसम्म सुर्खेत, चौरजहारी र जुम्लामा रहेका यातायात व्यवस्था कार्यालयहरूले २५ करोड ८१ लाख ४० हजार बराबरको राजस्व सङ्कलन गरेका हुन् ।

भौतिक पूर्वाधार तथा सहरी विकास मन्त्रालयका अनुसार, सबैभन्दा धेरै राजस्व प्रदेश राजधानी समेत रहेको वीरेन्द्रनगरस्थित सुर्खेत यातायात व्यवस्था कार्यालयले सङ्कलन गरेको छ । उक्त कार्यालयले ९ महिनामा एक्लै २२ करोड २७ लाख ४८ हजार राजस्व सङ्कलन गरेको हो ।

रुकुम पश्चिमको चौरजहारीमा रहेको यातायात कार्यालयले २ करोड ४५ लाख २२ हजार र जुम्लामा रहेको कार्यालयले १ करोड ८ लाख ६९ हजार राजस्व सङ्कलन गरेका छन् । चैत्र महिनामा मात्रै यी तीन वटा कार्यालयले झन्डै ८७ लाख बराबर राजस्व सङ्कलन गरेका छन् ।

मन्त्रालयका प्रवक्ता रमेश सुवेदीका अनुसार, यातायाततर्फ सबैभन्दा धेरै सवारी सधानको कर उठ्छ । यो शीर्षकमा मात्रै ९ महिनामा २० करोड ९६ लाख ८५ हजार १८८ रुपैयाँ उठेको छ । सुर्खेत कार्यालय एक्लैले १८ करोड २९ लाख २४ हजार, जुम्ला कार्यालयले ५१ लाख ३८ हजार ७०३ र चौरजहारी कार्यालयले २ करोड १६ लाख २२ हजार ४२६ रुपैयाँ सवारी सधान कर उठाएका छन् ।

रुट परमिट शीर्षकमा ७९ लाख ५३ हजार राजस्व सङ्कलन भएको । यो शीर्षकमा सुर्खेत कार्यालयले ६४ लाख ४० हजार, जुम्ला कार्यालयले १५ लाख १३ हजार रुपैयाँ उठाउँदा चौरजहारी कार्यालयले यो शीर्षकमा कुनै राजस्व सङ्कलन गरेको छैन ।

सवारी दर्ता र दस्तुर शीर्षकमा ४ करोड २ लाख २० हजार रकम सङ्कलन भएको छ, जसमध्ये सबैभन्दा धेरै सुर्खेत कार्यालयले ३ करोड ३१ लाख ३७ हजार रुपैयाँ सङ्कलन गरेको छ । जुम्लाले ४२ लाख १६ हजार र चौरजहारीले २८ लाख ६६ हजार रुपैयाँ सङ्कलन गरेका छन् । प्रशासनिक दण्ड, जरिवाना र जफत शीर्षकमा सुर्खेतले २ लाख ४६ हजार, जुम्लाले १ हजार ५७५ र चौरजहारीले ३३ हजार ३१५ रुपैयाँ राजस्व सङ्कलन गरेका छन् ।