काठमाण्डौ । नबिल बैंकले चालु आर्थिक वर्ष २०८२/८३ को तेस्रो त्रैमाससम्ममा आफ्नो व्यावसायिक दक्षतामा उल्लेख्य सुधार गर्दै खुद नाफामा ३३.९१ प्रतिशतको वृद्धि गरेको छ । बैंकले सार्वजनिक गरेको वित्तीय विवरणअनुसार चैत मसान्तसम्ममा ६ अर्ब ७६ करोड ४६ लाख रुपैयाँ खुद नाफा आर्जन भएको छ । गत आर्थिक वर्षको सोही अवधिमा बैंकले ५ अर्ब ५ करोड १४ लाख रुपैयाँ नाफा आर्जन गरेको थियो । विशेष गरी नोक्सानी व्यवस्थामा गरिएको भारी कटौती र खराब कर्जा व्यवस्थापनमा प्राप्त सफलताले बैंकको नाफा बढाउन मुख्य भूमिका खेलेको देखिन्छ ।
बैंकको खुद ब्याज आम्दानी ४० करोड ५० लाख रुपैयाँले बढेर १२ अर्ब ४५ करोड ९४ लाख रुपैयाँ पुगेको छ भने खुद शुल्क तथा कमिसन आम्दानी २ अर्ब ४३ करोड ७६ लाख रुपैयाँ कायम भएको छ । यसै गरी बैंकको सञ्चालन नाफा ७ अर्ब ६२ करोडबाट वृद्धि भई ९ अर्ब ६१ करोड रुपैयाँ पुगेको छ । आधार दर र स्प्रेड रेटमा संकुचन आए पनि व्यवसायको आकार बढेका कारण बैंकको समग्र वित्तीय स्वास्थ्य सुदृढ देखिएको छ ।
चालु आर्थिक वर्षको ९ महिनामा नबिल बैंक व्यवसाय विस्तारमा निकै आक्रामक देखिएको छ । गत असार मसान्तसम्म ४ खर्ब १० अर्ब ९९ करोड रुपैयाँ कर्जा प्रवाह गरेको बैंकले चैत मसान्तसम्ममा त्यसलाई बढाएर ४ खर्ब ४७ अर्ब ९४ करोड रुपैयाँ पुर्याएको छ । त्यसै गरी निक्षेप संकलन ५ खर्ब २४ अर्ब ६२ करोडबाट बढेर ५ खर्ब ७८ अर्ब ३४ करोड रुपैयाँ पुगेको छ । बजारमा रहेको अधिक तरलता र प्रतिस्पर्धाका कारण बैंकको स्प्रेड दर ३.३१ प्रतिशत र आधार दर ४.६५ प्रतिशतमा झरेको छ ।
बैंकको नाफामा बढोत्तरी हुनुको प्रमुख प्राविधिक कारण इम्पेयरमेन्ट चार्जमा आएको गिरावट हो । गत वर्षको चैतसम्म २ अर्ब २९ करोड ३२ लाख रुपैयाँ रहेको यस्तो व्यवस्था अहिले घटेर ४७ करोड ८७ लाख रुपैयाँमा झरेको छ । बैंकको निष्क्रिय कर्जाको अनुपातमा जोखिम व्यवस्था (टोटल लोन लस प्रोभिजन टु टोटल लोन) १०८.२० प्रतिशत पुगेको छ, जसले बैंकसँग खराब कर्जाभन्दा बढी प्रोभिजनिङ रकम सुरक्षित रहेको देखाउँछ । साथै बैंकले आफ्नो गैर-बैंकिङ सम्पत्तिलाई समेत घटाएर ३ अर्ब ८५ करोड रुपैयाँमा सीमित गर्न सफल भएको छ ।
समीक्षा अवधिमा निष्क्रिय कर्जा गत वर्षको ४.९६ प्रतिशतबाट घटेर ४.३७ प्रतिशतमा र खुद निष्क्रिय कर्जा ०.९८ प्रतिशतमा झरेको छ । बैंकको सिडी रेसियो ७९.५० प्रतिशत रहेकाले आगामी दिनमा थप कर्जा लगानी गर्न सक्ने पर्याप्त क्षमता बैंकसँग सुरक्षित छ । बैंकको प्रतिसेयर आम्दानी (ईपीएस) २५.०५ रुपैयाँबाट बढेर ३३.०२ रुपैयाँ पुगेको छ भने प्रतिसेयर नेटवर्थ २४३.३० रुपैयाँ कायम भएको छ ।
लगानीकर्ताका लागि महत्त्वपूर्ण मानिने लाभांश क्षमतामा पनि बैंकले सुधार गरेको छ । ५ अर्बको अग्राधिकार सेयरको लाभांश र अन्य नियामयकी समायोजनपछि बैंकको ९ महिनाको वितरणयोग्य नाफा ३ अर्ब ९० करोड २ लाख रुपैयाँ कायम भएको छ । गत वर्षको सञ्चित नाफासमेत जोड्दा कुल रिटेन्ड अर्निङ ४ अर्ब ३७ करोड ३६ लाख रुपैयाँ पुगेको छ । यस आधारमा ३२ अर्ब ५ करोड रुपैयाँ चुक्ता पुँजी भएको नबिल बैंकको वार्षिकीकृत लाभांश क्षमता २१.१६ प्रतिशत देखिएको छ ।
अर्थ चाैतारी ।
