काठमाण्डौ । प्रतिनिधिसभाको सभामुख पदमा सांसद डीपी अर्याल निर्विरोध भएका छन् ।

आज बिहान ११ बजेदेखि दिउँसो २ बजेसम्मका लागि तोकिएको मनोनयन दर्ताको समयमा अर्यालको मात्र एकल उम्मेदवारी परेपछि उनी निर्विरोध भएका हुन् । यद्यपि, उनी निर्वाचित भएको आधिकारिक घोषणा हुन भने बाँकी छ ।

प्रतिनिधिसभा नियमावलीको नियम ७ अनुसार, सभामुख पदमा एक जनाको मात्र मनोनयन परेमा सदनमा समर्थक सदस्यले बोलिसकेपछि अध्यक्षता गर्ने व्यक्तिले प्रस्तावित सदस्यलाई निर्विरोध निर्वाचित भएको घोषणा गर्ने प्रावधान छ । सोही प्रक्रिया अनुसार आगामी आइतबार बस्ने प्रतिनिधिसभाको बैठकले अर्याललाई सभामुख घोषित गर्नेछ ।

अर्याल सभामुख चुनिएसँगै अब उपसभामुखको निर्वाचन प्रक्रिया अगाडि बढ्नेछ । उपसभामुखको निर्वाचन नयाँ सभामुखले तोकेको दिन र समयमा हुने कानुनी व्यवस्था छ ।