एजेन्सी । प्रविधि क्षेत्रको दिग्गज कम्पनी एप्पलले लामो समयदेखि सीईओ रहँदै आएका टिम कुकले आफ्नो पद छोड्नेछन् र कम्पनीको सञ्चालक समितिको कार्यकारी अध्यक्षको भूमिका निर्वाह गर्ने सोमबार घोषणा गरेको छ कि । सेप्टेम्बर १ देखि हार्डवेयर इन्जिनियरिङका वरिष्ठ उपाध्यक्ष जोन टर्नसले सीईओको जिम्मेवारी सम्हाल्नेछन् ।

उनीसँग कम्पनीमा दुई दशकभन्दा बढीको अनुभव छ र त्यसको अधिकांश समय उनले एप्पलका उत्पादनहरूलाई परिभाषित गर्ने हार्डवेयर निर्माणमा बिताएका छन् । ५० वर्षीय टर्नस सन् २००१ मा उत्पादन डिजाइन टोलीको सदस्यका रूपमा एप्पलमा आबद्ध भएका थिए र बिस्तारै पदोन्नति हुँदै अघि बढे । उनी सन् २०१३ मा हार्डवेयर इन्जिनियरिङको उपाध्यक्ष बने र २०२१ मा वरिष्ठ उपाध्यक्षमा पदोन्नति भए जसले उनलाई आइफोन, म्याक, आइप्याड, एप्पल वाच र एयरपड्स लगायतका हार्डवेयरको जिम्मेवारी दियो ।

विगतका वर्षहरूमा उनले एप्पलका केही महत्त्वपूर्ण उत्पादन शृंखलाहरूको निरीक्षण गरेका छन् । उनले आईप्याड र एयरपड्स जस्ता उत्पादनहरूको सुरुवातमा मुख्य भूमिका खेलेका थिए भने हालै उनले आइफोन १७ शृंखला, अति–पातलो आइफोन एयर र नयाँ म्याक उपकरणहरू बनाउने टोलीको नेतृत्व गरेका थिए ।

एप्पलले इन्टेल चिप्स छोडेर आफ्नै सिलिकन उपयोग गर्न थालेपछि म्याक व्यवसायलाई पुनर्जीवित गर्न मद्दत गरेको श्रेय पनि उनलाई जान्छ । यस परिवर्तनले कार्यक्षमता र ब्याट्री लाइफमा ठूलो सुधार ल्याएको थियो ।

टर्नसलाई व्यापक रूपमा हार्डवेयरलाई प्राथमिकता दिने नेताका रूपमा हेरिन्छ । उनको कार्यशैली एप्पलको मूल दर्शनमा आधारित रहेको बताइन्छ जसले प्रविधिलाई मात्र नभई उत्पादनलाई नै केन्द्रमा राख्छ । प्रविधि समीक्षा साइट टम्स गाइडसँगको भर्खरैको अन्तर्वार्तामा उनले यसलाई सरल रूपमा व्याख्या गर्दै एप्पलको उद्देश्य प्रविधि बिक्री गर्नु मात्र नभई उत्कृष्ट उत्पादनहरू बनाउन त्यसको प्रयोग गर्नु हो भनेका थिए ।

‘हामी कसरी प्रविधिको फाइदा उठाएर अद्भुत उत्पादनहरू प्रदान गर्न सकिन्छ भनी सधैं सोच्छौं ।’

कम्पनीभित्र उनी हरेक स–साना विवरणमा ध्यान दिने र प्रत्यक्ष संलग्न हुने व्यक्तिका रूपमा चिनिन्छन् । उनको करियरको सुरुवाती दिनहरूको एउटा प्रसंग अक्सर चर्चा गरिन्छ जहाँ उनले एउटा स्क्रुमा रहने खापाको संख्याबारे बहस गरेका थिए । प्रयोगकर्ताले नदेखे पनि ती एप्पलको सटीक मापदण्ड अनुसार हुनुपर्नेमा उनले जोड दिएका थिए । यो एउटा सानो उदाहरण मात्र हो तर यसले उत्पादन डिजाइनमा उनको पूर्णतावादी स्वभावलाई झल्काउँछ ।

एप्पलमा आबद्ध हुनुअघि टर्नसले भर्चुअल रिसर्च सिस्टम्समा मेकानिकल इन्जिनियरको रूपमा काम गरेका थिए । उनले पेन्सिल्भेनिया विश्वविद्यालयबाट मेकानिकल इन्जिनियरिङमा स्नातक गरेका छन् ।