काठमाण्डौ । प्रोटोन गाडीको आधिकारिक वितरक जगदम्बा मोटर्सले पुराना गाडी साटेर नयाँ लिन चाहने ग्राहकका लागि ‘सेल्स एण्ड एक्सचेन्ज एक्सीलेन्स’ योजना सार्वजनिक गरेको छ । आइतबारदेखि सुरु भएको यो योजना वैशाख १५ गतेसम्म देशभरका प्रोटोन शोरुममा सञ्चालन हुने कम्पनीले जनाएको छ ।

यस योजनाअन्तर्गत ग्राहकले जुनसुकै पुराना सवारी साधनसँग प्रोटोनका नयाँ मोडलहरू साट्न पाउनेछन् । पछिल्लो समय विद्युतीय गाडी (ईभी) तर्फ बढ्दै गएको आकर्षणलाई ध्यानमा राख्दै कम्पनीले प्रोटोन ‘e.MAS 7’ लगायतका अन्य विभिन्न भेरियन्टमा विशेष सुविधा र सहुलियत उपलब्ध गराएको छ ।

एक्सचेन्जमा सहभागी हुने ग्राहकलाई आकर्षक नगद छुटका साथै पुरानो गाडीको उत्कृष्ट मूल्याङ्कन प्रदान गरिने कम्पनीको विज्ञप्तिमा उल्लेख छ । यसका अतिरिक्त गाडी खरिद गर्नेले एक वर्षको निःशुल्क बीमा, एक वर्षको सडक दस्तुर, ७ किलोवाटको चार्जर र ८ वर्षको वारेन्टी समेत पाउनेछन् ।

सवारी खरिद प्रक्रियालाई सहज, भरपर्दो र मूल्यवान् बनाउन यो अभियान सुरु गरिएको कम्पनीले जनाएको छ । वातावरणीय मैत्री यातायातका साधन रोज्न चाहने ग्राहकका लागि यो योजना प्रभावकारी हुने र यसले आधुनिक मोबिलिटीमा प्रोत्साहन पुग्ने विश्वास जगदम्बा मोटर्सले लिएको छ ।