काठमाण्डौ । नेपाल सरकार, प्रधानमन्त्री तथा मन्त्रिपरिषद्को कार्यालयले सार्वजनिक खरिद पुनरावलोकन समितिमा रिक्त रहेका अध्यक्ष र सदस्य पदका लागि दरखास्त आह्वान गरेको छ ।

समितिमा रिक्त रहेको एक जना अध्यक्ष र दुई जना सदस्य पदमा नियुक्तिका लागि योग्यता पुगेका इच्छुक नेपाली नागरिकहरूबाट आवेदन माग गरिएको हो । सार्वजनिक खरिद ऐन, २०६३ को दफा ४९ बमोजिमको कार्य गर्नका लागि सोही ऐनको दफा ४८ अनुसार यी पदहरूमा पदपूर्ति गर्न लागिएको कार्यालयले जनाएको छ ।

सूचना प्रकाशित भएको मितिले ७ दिनभित्र इच्छुक उम्मेदवारले केशरमहल, काठमाडौँस्थित सार्वजनिक खरिद अनुगमन कार्यालयमा आफ्नो आवेदन दिनुपर्नेछ । उम्मेदवार हुनका लागि सार्वजनिक खरिद ऐन बमोजिमको योग्यता र अनुभव भएको हुनुपर्नेछ । साथै, कुनै पनि विदेशी मुलुकको नागरिकता वा स्थायी/अस्थायी आवासीय अनुमति पत्र नलिएको र प्रचलित कानूनले अयोग्य नठहर्याएको व्यक्ति हुनुपर्ने सूचनामा उल्लेख छ ।

प्राप्त भएका आवेदनहरू मध्येबाट प्रधानमन्त्री तथा मन्त्रिपरिषद्को कार्यालयले संक्षिप्त सूची (सर्टलिस्ट) तयार गरी नेपाल सरकार मन्त्रिपरिषद्मा पेश गर्नेछ । सोही सूचीका आधारमा उपयुक्त देखिएका उम्मेदवारलाई मन्त्रिपरिषद्ले नियुक्त गर्ने व्यवस्था छ ।