काठमाण्डौ । फाइभजी परीक्षणको जिम्मेवारी पाएको नेपाल टेलिकमले काठमाण्डौसँगै पोखरा र वीरगन्जमा पनि परीक्षण सुरु गरेको छ । टेलिकमले यसअघि काठमाण्डौको बबरमल र सुन्धारामा फाइभजीको टावर राखेर परीक्षण सुरु गरिरहेको हो ।

गण्डकीको पोखरा र मधेस प्रदेशको वीरगन्जबाट समेत फाइभजीको परीक्षण सुरु भएको हो । यससँगै, देशका ४ स्थानबाट फाइभजी परीक्षण सुरु भएको टेलिकमका सहप्रवक्ता परमात्मा भट्टराईले जानकारी दिए । ‘टावर जडानको काम सम्पन्न भएपछि परीक्षण सुरु भएको छ,’ भट्टराईले भने, ‘तर, यो एक÷दुई दिनमा सकिने परीक्षण होइन ।’

टावर जडानको काम सकिएसँगै फाइभजी जडान गर्दा आउने समस्या र चुनौतीका विषयमा अध्ययन हुन्छ । जोडिएका टावरबाट प्रवाह हुने सेवाकामाध्यमबाट हुने परिणाम लगायतका विषय समेत हेरिन्छ । टेलिकमले चिनियाँ कम्पनी हुवावेसँगको समन्वयमा नेपालमा फाइभजी परीक्षण गरिरहेको छ ।