काठमाण्डौ । निर्जीवन बीमा व्यवसायी संघका अध्यक्ष राजेन्द्र मल्लले मुलुकमा बीमाको महत्व बढिरहेको भन्दै बीमा कम्पनीहरुले उपभोक्ताको सेवालाई ध्यानमा राख्दै अन्तर्राष्ट्रिय असल अभ्यासहरू पनि भित्र्याउन आवश्यक रहेको बताएका छन् । प्रभु इन्स्योरेन्सका अध्यक्षसमेत रहेका मल्लले प्रभु इन्स्योरेन्सको ३०औँ वार्षिकोत्सवको अवसरमा आयोजित कार्यक्रममा बीमा कम्पनी र सरकारले गाउँ गाउँमा बीमाबारे जागरण ल्याउनुपर्ने बताएका हुन् ।

उनले ‘बीमा गरौँ, ढुक्क बनौँ’ भन्ने विषय केवल शब्द मात्रै नभएको भन्दै बीमाको प्रभावकारीताबारे सरकारी क्षेत्र र निजी क्षेत्रले मिलेर काम गर्नुपर्ने बताएका छन् । नेपाल चेम्बर अफ कमर्सका निवर्तमान अध्यक्षसमेत रहेका मल्लले सरकारले बीमा क्षेत्र र बीमा उद्योगलाई बढी ‘रेगुलेट’ गर्ने भन्दा पनि अभिभावकत्व प्रदान गरेर फैलिन दिनुपर्ने धारणा राखेका छन् । यसैगरी, विपत्तिको पीडामा सेवा दिने क्षेत्र भएकाले बीमा उद्योगको विकासमा सरकारको पनि उत्तिक्कै जिम्मेवारी रहने उनको भनाइ छ ।

साथै, प्रभु इन्स्योरेन्समा आफू सञ्चालक समितिमा सुरुदेखि नै संलग्न रहेको र अहिले अध्यक्षको रूपमा सेवारत रहेको बताउँदै मल्लले कम्पनीले आर्थिक वर्ष ०८१/८२ मा आर्जन गरेको मुनाफाबाट १८ प्रतिशत बोनस घोषणा गर्न पाउँदा गर्व लागेको पनि बताएका छन् ।