काठमाण्डौ । विदेशी परामर्शदाताले नेपालमा परामर्श दिएर मात्रै १४ अर्ब बढीको रकम विदेश लगेका छन्। चालू आर्थिक वर्षको ४ महिनामै नेपालबाट परामर्श व्यस्थापकीय र व्यावसायिक परामर्श शीर्षकमा १४ अर्ब ५९ करोड ६२ लाख रुपैयाँ बाहिरिएको हो।

नेपालका निजी तथा सरकारी संस्थाहरुले विदेशी परामर्शदाता तथा व्यवस्थापकहरुबाट लिएको सुविधाबापतको रकम पछिल्लो समय हरेक वर्षजसो बढ्ने क्रममा छ। गत वर्ष सोही अवधिमा ११ अर्ब ९३ करोडबराबरको परामर्श सुविधा लिएकोमा चालू आवमा ३ अर्ब ५८ करोड रुपैयाँले बढी देखिएको हो। चालू आर्थिक वर्षको सुरुवातीसँगै ठूला सरकारी तथा व्यावसायिक संस्थाहरुमा क्षति पुगेको कारण पनि परामर्श तथा व्यवस्थापनमा विदेशी परामर्शदाताहरुको माग बढाएको थियो।

यसले पनि परामर्श तथा व्यवस्थापन सुविधा आयात बढ्न पुगेको राष्ट्र बैंकको तथ्यांकले देखाएको छ। परामर्शबाट विदेशिने रकम बढे पनि नेपालले भित्र्याउने रकम भने उल्लेख्य बढ्न सकेको छैन। चालू आवको चार महिनामा १४ अर्ब माथिको रकम विदेशी परामर्शदाताले लैजाँदा नेपालीले भने सोही शीर्षकमा १ अर्ब ३६ करोड २ लाख मात्रै भित्र्याउन सफल बनेका हुन्।

गत वर्षबाट मात्रै तथ्यांक राख्न थालेको नेपाल राष्ट्र बैंकले परामर्शमा पनि नेपालको घाटा गहिरिन थालेको देखिएको हो। गत वर्ष परामर्श तथा व्यवस्थापन शीर्षकमा नेपालको व्यापारघाटा ९ अर्ब ८४ करोड रुपैयाँ रहेकोमा चालू आवको ४ महिनामा यस्तो घाटा बढेर १३ अर्ब २३ करोडमा पुगेको छ।