क्यालिफोनिर्या । अमेरिकी कृत्रिम बौद्धिकता (एआई) कम्पनी एन्थ्रोपिकले सोमबार प्राथमिक सेयर निष्कासन (आईपीओ)को तयारी गरिरहेको छ । कम्पनी अमेरिकी सेयर नियामक सेकमा गोप्य रूपमा दर्ता प्रक्रिया सुरु गरेको घोषणा गरेको छ । यस कदमले कम्पनीलाई सेयर बजारमा प्रवेश गर्ने बाटो खोलिदिएको छ र यसको मूल्याङ्कन एक ट्रिलियन अमेरिकी डलरको हाराहारीमा पुग्न सक्ने अनुमान गरिएको छ ।

कम्पनीले हालसम्म कति सेयर बिक्री गर्ने वा मूल्य कति निर्धारण गर्ने भन्ने जानकारी सार्वजनिक गरेको छैन । तर दर्ता प्रक्रियाले कम्पनीलाई सार्वजनिक कम्पनी बन्ने दिशामा अगाडि बढाएको छ । एन्थ्रोपिक यस वर्ष अपेक्षित तीन प्रमुख एआई कम्पनीहरूको आईपीओमध्ये एक हो । ओपनएआई र स्पेसएक्सले पनि पनि आईपीओ ल्याउँदैछन् ।

एन्थ्रोपिकको मूल्याङ्कन यस वर्ष उल्लेखनीय रूपमा बढेको छ । फेब्रुअरीमा करिब ३८० अर्ब अमेरिकी डलर रहेको मूल्याङ्कन मे महिनासम्म आइपुग्दा ९६५ अर्ब अमेरिकी डलर पुगेको बताइएको छ ।

कम्पनीले विभिन्न प्रविधि साझेदारीमार्फत अर्बाैं डलरका सम्झौताहरू पनि गरेको छ । अप्रिलमा एन्थ्रोपिकले अमेजन वेब सर्भिसेज (एडब्लुएस) सँग १०० अर्ब डलरभन्दा बढी मूल्यको पूर्वाधार प्रयोग गर्ने प्रतिबद्धता जनाएको थियो । यो पूर्वाधार कम्पनीको लोकप्रिय एआई सहायक ‘क्लाउड’ सञ्चालन र प्रशिक्षणका लागि प्रयोग गरिनेछ ।