काठमाण्डौ । सन् २०२४ मा नेपालको उपभोक्ता मुद्रास्फीति अधिकतम ६.७ प्रतिशतसम्म रहने विश्व बैङ्कले प्रक्षेपण गरेको छ । विश्व बैङ्कले सार्वजनिक गरेको ‘नेपाल डेभलपमेन्ट अपडेट, अप्रिल २०२४’ अनुसार आगामी वर्ष अर्थात् सन् २०२५ मा भने मुद्रास्फीति ६ प्रतिशतमा झर्ने अनुमान गरिएको छ ।

चालू आर्थिक वर्षको बजेटबाट सरकारले केही वस्तुको मूल्य अभिवृद्धि कर (भ्याट)मा छुट दिएकोमा त्यसले पनि मुद्रास्फीति बढाएको उल्लेख छ।

यस वर्ष खाद्य तथा पेय पदार्थको मुद्रास्फीति बढेको छ । चामल निर्यातमा भारतले लगाएको प्रतिबन्ध र मरमसलामा देखिएको मूल्यवृद्धिको असर समग्र मुद्रास्फीतिमा देखिएको छ । गतवर्ष नेपालको आर्थिक वृद्धिदर १ दशमलव ९ प्रतिशत रहेकोमा यसवर्ष ३ दशमलव ३ प्रतिशत रहेको छ । यस्तै आगामी वर्ष अर्थात् सन् २०२५ मा आर्थिक वृद्धिदर औसत ५ प्रतिशत हाराहारी रहने प्रक्षेपण विश्व बैङ्कले गरेको छ ।

यसअघि विश्व बैङ्कले ‘ग्लोबल इकोनोमिक प्रस्पेक्ट्स, जनवरी २०२४’ मार्फत् वर्ष २०२३/२४ मा नेपालको आर्थिक वृद्धिदर ३ दशमलव ९ प्रतिशत र वर्ष २०२४/२५ मा ५ प्रतिशत रहने प्रक्षेपण सार्वजनिक गरेको थियो । तर अहिले उक्त अनुमान घटाएको छ ।

चालू वर्षको अर्धवार्षिक अवधिमा रेमिट्यान्स आप्रवाह जिडिपीको तुलनामा १०.९ प्रतिशतबाट बढेर १२.३ प्रतिशत पुगेको र व्यापार घाटा जिडिपीको १३।२ प्रतिशतबाट घटेर ११.६ प्रतिशत रहेको विश्व बैंकको प्रतिवेदनमा उल्लेख छ।