काभ्रेपलाञ्चोक। काभ्रेपलाञ्चोकको खानीखोला गाउँपालिकाले तिहारको अवसरमा घर लिपपोत गर्दा परम्परागत संस्कृतिलाई जोगाउन स्थानीय बासिन्दालाई अनुरोध गरेको छ।

गाउँसभाले निर्णय गरेअनुसार, दीपावलीमा घरआँगन र ढोका झ्याललाई कमेरो (सेतो माटो) र रातो माटोले लिपपोत गर्ने परम्परा पुनर्जीवित गर्ने अभियान सुरु गरिएको छ। गाउँपालिका अध्यक्ष इन्द्रबहादुर थिङले आधुनिकतासँगै माटोले घर लिप्ने परम्परा घट्दै गएको बताउँदै यसले गाउँको मौलिकता, सौन्दर्य र सांस्कृतिक पहिचानमा असर गरेको बताए।

उहाँका अनुसार, माटोले घर लिपपोत गर्नु केवल धार्मिक वा सौन्दर्यका लागि मात्र नभई सामाजिक एकता र परम्पराको संरक्षणमा पनि महत्वपूर्ण छ। पुर्खाले सदियौँदेखि दीपावलीमा घर लिप्ने परम्परा जोगाउँदै आएका हुन्।

गाउँपालिकाले सबै नागरिक, टोल समिति र विद्यार्थीलाई अभियानमा सक्रिय सहभागिता जनाउन आग्रह गरेको छ। यसले घरको शृङ्गारिकता बढाउने मात्र नभई पर्यटन प्रवर्द्धनमा पनि योगदान पुर्‍याउने अपेक्षा गरिएको छ।