काठमाण्डौ । चालु आर्थिक वर्ष २०८२/८३ को पाँच महिनाको अवधिमा नेपालमा सवारी साधन र स्पेयर पार्टस् आयातमा वृद्धि भएको छ । भन्सार विभागको तथ्याङ्क अनुसार पछिल्लो पाँच महिनामा ४४ अर्ब ८१ करोड रुपैयाँ बराबरको सवारी साधन र त्यसका पार्टपूर्जा आयात भएको हो ।

विभागको तथ्याङ्क अनुसार गत वर्षको तुलनामा सवारी साधन आयातमा वृद्धि देखिएको छ । गत आर्थिक वर्ष २०८१/८२ को सोही अवधिमा करिब ३८ अर्ब रुपैयाँ बराबरको सवारी साधन आयात भएको थियो । तर, अघिल्लो महिनाको तुलनामा विद्युतीय सवारी साधन आयात घटेको छ । पाँच महिनामा १२ अर्ब ३४ करोड रुपैयाँ बराबरका २३ हजार २६ युनिट विद्युतीय सवारीसाधन आयात भएका छन् । यसबाट सरकारले ६ अर्ब ६१ करोड रुपैयाँ भन्सार शुल्क संकलन गरेको छ ।

गत वर्ष सोही अवधिमा १५ अर्ब रुपैयाँ बराबरका १८ हजार ४६१ युनिट विद्युतीय सवारीसाधन आयात गरिएको थियो । त्यस्तै, २९ अर्ब २६ करोड रुपैयाँ बराबरका १ लाख ३८ हजार २३० युनिट इन्धन सवारीसाधन आयात भएका छन् । यसबाट सरकारले ३१ अर्ब ३३ करोड रुपैयाँ भन्सार शुल्क संकलन गरेको विभागले जनाएको छ ।

गत आवको पाँच महिनामा २० अर्ब २८ करोड रुपैयाँ बराबरका १ लाख १० हजार ४९ युनिट इन्धन सवारीसाधन आयात भएका थिए । हुन्डाइ लक्ष्मी इन्टरकन्टिनेन्टलका प्रबन्ध निर्देशक दीपक थपलियाले भदौ र असोजको तुलनामा कमी आएको बताए । उनले चाडपर्वको समयमा धेरै आयात हुने गरेकाले मंसिर पुस महिनामा कमी आउन स्वाभाविक भएको बताए ।

उनले भने,‘ थोरै कमी देखिएको छ तर स्वाभाविक हो । सिजनको समयमा धेरै आयात हुन्छ । अहिले अफसिजन भएकाले थोरै विद्युतीय सवारी साधनमा कमी देखिएको हो । व्यवसायीहरूको लागि हरेक वर्ष हुने निरन्तर प्रक्रिया हो ।’