काठमाण्डौ । इन्टरनेशनल करिकुलम एसोसिएसन (आईसीए)ले संस्कृति इन्टरनेशनल स्कुलकी संस्थापक निर्देशक दीप्ति आचार्यलाई सन् २०२५-२०२६ का लागि आफ्नो राजदूत नियुक्त गरेको छ ।
आईसीए ९० भन्दा बढी देशका १,००० भन्दा बढी विद्यालयहरूलाई सहयोग गर्दै आएको एक विश्वव्यापी संस्था हो । आचार्यले अब नेपालका साथै छिमेकी देशहरूमा पनि यस संस्थाको प्रतिनिधित्व गर्नेछिन् । यो नियुक्तिले विगत दुई दशकदेखि प्रगतिशील शिक्षाको क्षेत्रमा उनले पुर्याएको योगदानको कदर गरेको छ ।
आफ्नो कार्यकालमा आचार्यले आईसीए अन्तर्गतका विभिन्न पाठ्यक्रमहरू जस्तै International Early Years Curriculum (IEYC), International Primary Curriculum (IPC) र International Middle Years Curriculum (IMYC) मार्फत शिक्षकहरूको सञ्जाल विस्तार र सुदृढ गर्ने भूमिका खेल्ने विश्वास गरिएको छ ।
उनको नेतृत्वमा रहेको संस्कृति इन्टरनेशनल स्कुल दक्षिण एसियामै प्रतिष्ठित IPC मान्यता प्राप्त गर्ने पहिलो विद्यालय बन्न सफल भएको थियो । अब राजदूतका रूपमा उनले अन्य विद्यालयहरूलाई मार्गदर्शन गर्ने, तालिम दिने र अन्तर्राष्ट्रिय पाठ्यक्रमहरूको गुणस्तरीय कार्यान्वयनलाई प्रवर्द्धन गर्ने जिम्मेवारी सम्हाल्नेछिन् ।
आईसीएकी निर्देशक सारा ब्ल्याकमोरले आचार्यको नियुक्तिप्रति खुसी व्यक्त गर्दै उनको गुणस्तरीय शिक्षाप्रतिको प्रतिबद्धताले एसिया प्रशान्त क्षेत्रका विद्यालयहरूलाई प्रेरणा दिने बताइन् ।
यो ‘आईसीए एम्बासडर’ कार्यक्रमले प्रभावकारी शैक्षिक नेतृत्वकर्ताहरूलाई मात्र छनोट गर्ने गर्दछ । आचार्यको कार्यकालले अन्तर्राष्ट्रिय विद्यालयहरूको सञ्जाल सुदृढ बनाउन र शिक्षण विधिको उत्कृष्ट अभ्यास प्रवर्द्धन गर्न महत्त्वपूर्ण योगदान पुर्याउने अपेक्षा गरिएको छ ।
नेपालमा प्रगतिशील शिक्षाको अगुवा मानिने दीप्ति आचार्य एक एएमआई-प्रशिक्षित मन्टेश्वरी शिक्षिका हुन् र उनले अमेरिकाबाट यसै विषयमा स्नातकोत्तर गरेकी छन् ।
विगत पाँच वर्षदेखि अन्तर्राष्ट्रिय ट्रेनरका रूपमा सक्रिय रहेकी आचार्य टोस्टमस्टर्स इन्टरनेशनलमा पनि विशिष्ट नेतृत्वकर्ता हुन् । साथै, उनी जोन्टा क्लब अफ काठमाडौंमार्फत महिला तथा बालबालिकाको अधिकारका लागि वकालत गर्ने एक सामाजिक अभियन्ता पनि हुन् ।
अर्थ चाैतारी ।
