काठमाण्डौ ।सरकारले आगामी आर्थिक वर्ष २०८३/८४ को लागि २१ खर्ब २४ अर्ब ३४ करोड रुपैयाँको बजेट ल्याएको छ । अर्थमन्त्री डा. स्वर्णिम वाग्लेले शुक्रबार संघीय संसद्को संयुक्त सदनमा आगामी आर्थिक वर्षको बजेट प्रस्तुत गरेका हुन् ।
सरकारले चालु आर्थिक वर्ष २०८२/८३ को लागि कुल १९ खर्ब ६४ अर्ब ११ करोड रुपैयाँको बजेट ल्याएको थियो । चालुतर्फ १२ खर्ब ७० अर्ब ५८ करोड रुपैयाँ बजेट विनियोजन गरिएको छ। गत आर्थिक वर्षमा चालु खर्चतर्फ ११ खर्ब ८० अर्ब ९८ करोड रुपैयाँ बजेट विनियोजन गरिएको हो ।
यस्तै पुँजीगततर्फ ४ खर्ब ३१ अर्ब १० करोड रुपैयाँ बजेट विनियोजन गरिएको छ। चालु आर्थिक वर्षमा ४ खर्ब ७ अर्ब ८९ करोड रुपैयाँ बजेट विनियोजन गरेका छन् ।
वित्तीय व्यवस्थातर्फ सरकारले ४ खर्ब २२ अर्ब ६४ करोड रुपैयाँ बजेट विनियोजन गरेको छ। गत आर्थिक वर्षमा ४ खर्ब १७ अर्ब ८३ करोड रुपैयाँ बजेट विनियोजन गरेका छन् ।
सरकारले आगामी आर्थिक वर्षको लागि गरेको खर्च अनुमान व्यहोर्ने स्रोतमध्ये राजस्व १४ खर्ब ५ अर्ब ३१ करोड रुपैयाँ संकलन हुने अनुमान गरेको छ । त्यस्तै वैदेशिक अनुदानबाट ६१ अर्ब ७४ करोड र अपुग हुने ६ खर्ब ५७ अर्ब २९ करोड ऋणमार्फत स्रोत व्यवस्थापन गर्ने अर्थमन्त्री वाग्लेले बताए ।
जसमध्ये २ खर्ब ४७ अर्ब २८ करोड वैदेशिक ऋणबाट र ४ खर्ब १० अर्ब आन्तरिक ऋणबाट स्रोत व्यवस्थापन गरिने उनले बताए।
अर्थ चाैतारी ।
