काठमाडौं । राष्ट्रिय स्वतन्त्र पार्टीकी सांसद आशिका तामाङले पृथ्वी राजमार्गमा विद्युत् आपूर्तिको समस्याका कारण विद्युतीय सवारी साधन (ईभी) प्रयोगकर्ताहरू मर्कामा परेको बताएकी छिन् ।
सोमबार बसेको प्रतिनिधि सभा बैठकको शून्य समयमा बोल्दै सांसद तामाङले धादिङ क्षेत्र नम्बर १ मा पर्ने राष्ट्रिय राजमार्गमा चार्जिङ स्टेशनहरू भए पनि बिजुली नहुँदा यात्रुहरू अलपत्र पर्ने गरेको गुनासो गरेकी हुन् ।
‘अहिले पेट्रोल र डिजेलको मूल्य अत्यधिक महँगो छ, जसका कारण धेरैले ईभी प्रयोग गर्न थालेका छन् । तर यात्राका क्रममा गाडीको चार्ज सकिएपछि चार्ज गर्न खोज्दा बिजुली हुँदैन,’ उनले भनिन्, ‘लाइन नभएपछि चार्जिङ स्टेशनहरू बन्द हुन्छन् र यात्रुहरू बीच बाटोमै अलपत्र पर्छन् ।’
उनले पृथ्वी राजमार्ग धादिङबासीको मात्र नभई देशभरका मानिसहरू हिँड्ने राष्ट्रिय राजमार्ग भएको उल्लेख गर्दै यस क्षेत्रका समस्याहरू धेरै रहेको बताइन् । ‘राष्ट्रिय राजमार्गमा यति धेरै समस्याहरू छन् कि ती सबै लेख्ने हो भने दुईवटा किताब नै भरिन्छ होला । तर समयको पावबन्दीका कारण मैले यो जल्दोबल्दो समस्या मात्र उठाएकी हुँ,’ उनले भनिन्।
सांसद तामाङले बिजुली नभएपछि यात्रुहरूले सञ्चार सम्पर्कका लागि मोबाइल समेत चार्ज गर्न नपाउने र सहयोगका लागि कसैलाई सम्पर्क गर्न समेत कठिन हुने अवस्था रहेको बताइन् ।
उनले सरकारलाई राष्ट्रिय राजमार्गमा चौबिसै घण्टा विद्युत् आपूर्ति सुनिश्चित गर्न र चार्जिङ स्टेशनहरूको प्रभावकारिता बढाउन माग गरेकी छिन् । पछिल्लो समय नेपालमा विद्युतीय सवारी साधनको प्रयोग बढ्दै गए पनि राजमार्गहरूमा पर्याप्त र भरपर्दो चार्जिङ पूर्वाधार नहुँदा लामो दुरीका यात्रुहरूले सास्ती खेप्दै आएका छन् ।
अर्थ चाैतारी ।
