काठमाण्डौ । श्रम, रोजगार तथा सामाजिक सुरक्षा मन्त्रालयले वैदेशिक रोजगारीमा जाने कामदारको मेडिकल परीक्षण गर्दै आएका ७० स्वास्थ्य संस्थाको सेवा हालका लागि बन्द गर्ने निर्णय गरेको छ ।

मन्त्रालयले गत माघ १२ गते नै मापदण्ड पूरा गर्न निर्देशन दिए पनि पालना नगरेका कारण ती स्वास्थ्य संस्थाले बैदेशिक रोजगारीमा जाने श्रमिकको स्वास्थ्य परीक्षण गर्न नपाउने निर्णय गरेको हो ।

मन्त्रालयले गत भदौमा २ सय १३ वटा स्वास्थ्य संस्थाको अनुगमन गर्दा मापदण्ड पूरा नगरेका संस्थालाई मापदण्ड पूरा गर्न निर्देशन दिएको थियो । सरकारले थप ६७ वटा स्वास्थ्य संस्थालाई तोकिएको मापदण्ड पूरा गर्न एक महिनाको समय दिइएको छ ।

मन्त्रालयमा २ सय १५ स्वास्थ्य संस्था दर्ता भएकामध्ये केहीले स्वास्थ्य परीक्षणबिना नै ‘मेडिकल रिपोर्टर्’ दिने गरेको अनुगमनका क्रममा पाइएको, केहीमा कर्मचारी र उपकरण पर्याप्त नभएको, केहीले दर्ता नगरेको जस्ता समस्या रहेको पाइएको मन्त्रालयले जनाएको छ ।