काठमाण्डौ । भारतको सबैभन्दा ठूलो समूह टाटा समूहको होल्डिङ कम्पनी टाटा सन्सले जुन १२ मा अहमदाबादमा भएको एयर इन्डिया दुर्घटनाका पीडितलाई आर्थिक सहयोग प्रदान गर्न कोष खडा गरेको छ। जसका लागि बोर्डबाट स्वीकृति माग गरिएको छ। इकोनोमिक टाइम्सको रिपोर्टका अनुसार कम्पनीका अध्यक्ष एन चन्द्रशेखरनले बिहीबार अन्तरिम बोर्ड बैठकमा कोषका बारेमा बोर्डलाई जानकारी गराएका थिए। ‘टाटा सन्सले उक्त कोषका लागि ५०० करोड रुपैयाँ विनियोजनका लागि स्वीकृति मागेको छ’, रिपोर्टमा भनिएको छ।

टाटा समूहको होल्डिङ कम्पनीले पहिले दुई छुट्टाछुट्टै कोष गठन गर्ने विचार गरेको थियो। एउटा भारतीय नागरिकका परिवारका लागि र अर्को लन्डन जाने उडानको दुर्घटनामा मारिएका विदेशी नागरिकहरुका लागि। ५०० करोड रुपैयाँ विमान दुर्घटनामा ज्यान गुमाएकाहरुका परिवारलाई क्षतिपूर्ति, चिकित्सा हेरचाह र विमान दुर्घटनामा क्षतिग्रस्त मेडिकल कलेज सुधार गर्न प्रयोग गरिनेछ। बाँकी रकम प्रभावित परिवारहरुको दीर्घकालीन आवश्यकताहरु पूरा गर्न प्रयोग गरिनेछ। कोष चाँडै दर्ता हुने अपेक्षा गरिएको छ।

यो पहल टाटा मोटर्सका समूहका सीएफओ पीबी बालाजीको नेतृत्वमा भइरहेको छ। उनीसँग नियामक, वित्तीय र कर्पोरेट प्रशासन मामिलामा बढी अनुभव छ। यसबाहेक यो कोषलाई बलियो बनाउन टाटा समूह बाहिरका मानिसहरुलाई पनि समावेश गरिनेछ। टाटा ट्रस्टले पनि यसमा योगदान गर्ने सम्भावना छ। बोर्ड बैठकमा टाटा ट्रस्टका मनोनित नोएल टाटा, वेणु श्रीनिवासन र विजय सिंह उपस्थित थिए।

गत जुन १२ मा अहमदाबादमा एयर इन्डियाको विमान दुर्घटनाग्रस्त भएको थियो। जसमा २७५ जनाले ज्यान गुमाए। यस विमानमा सवार २४२ जनामध्ये २४१ जनाले ज्यान गुमाए। यसमध्ये केवल एक यात्रु विश्वास रमेश बाँचे। सोही समयमा मेडिकल कलेज वरपरका मानिसहरुले पनि विमान खस्दा ज्यान गुमाएका थिए। यो दुर्घटनापछि एयर इन्डियाले क्षतिपूर्ति घोषणा गरेको थियो। यससँगै बोइङ ८७८ को पनि अनुसन्धान सुरु गरिएको थियो।