काठमाण्डौ । चालु आर्थिक वर्षको बजेट तथा कार्यक्रम कार्यान्वयनलाई प्रभावकारी बनाउने उद्देश्यले उद्योग, वाणिज्य तथा आपूर्ति मन्त्री दामोदर भण्डारी र उपप्रधानमन्त्री तथा अर्थमन्त्री विष्णु पौडेलबीच आज अर्थ मन्त्रालयमा विशेष बैठक सम्पन्न भएको छ।

बैठकमा विशेषगरी विदेशबाट आयात हुने वस्तुहरूमा ‘नेपाल गुणस्तर’ (Nepal Standards) प्रमाणिकरण अनिवार्य गर्ने निर्णय गरिएको उद्योग मन्त्रालयले जनाएको छ। प्रारम्भमा केही निश्चित वस्तुहरूमा मात्र यो मापदण्ड लागू गरिने र क्रमशः सबै आयातित वस्तुहरूमा अनिवार्य रूपमा नेपाल गुणस्तर लागू गरिने तयारी गरिएको छ।

यस निर्णयबाट गुणस्तरीय वस्तुको उपभोग सुनिश्चित हुने, उपभोक्ता संरक्षणमा टेवा पुग्ने र स्वदेशी उद्योगलाई प्रतिस्पर्धामा प्रोत्साहन मिल्ने विश्वास गरिएको छ।

यसबाहेक, बैठकमा विशेष आर्थिक क्षेत्र प्राधिकरण (SEZA) र औद्योगिक क्षेत्र व्यवस्थापन लिमिटेडमार्फत लिजमा दिइने औद्योगिक जग्गाको भाडा पनि घटाउने निर्णय गरिएको छ। पहिले प्रतिवर्गमिटर ५० रुपैयाँ कायम गरिएको लिज भाडा अब घटाएर २० रुपैयाँ बनाइनेछ। यो व्यवस्था सरकारले उद्योग प्रवर्द्धन र लगानी आकर्षण गर्ने उद्देश्यले चालु आर्थिक वर्षको नीति तथा कार्यक्रममा समावेश गरेको थियो।

बैठकमा चालु आवमा विनियोजित बजेट तथा कार्यक्रमहरू प्रभावकारी ढंगले कार्यान्वयन गर्न आवश्यक रणनीति, समन्वय र प्राथमिकताबारे समेत विस्तृत छलफल भएको छ। दुबै मन्त्रालयले सहकार्य गर्दै औद्योगिक विकास, रोजगारी सिर्जना र समग्र अर्थतन्त्र सुदृढीकरणका लागि आवश्यक नीतिगत तथा कार्यगत सुधारलाई प्राथमिकता दिने प्रतिबद्धता व्यक्त गरेका छन्।