काठमाण्डौ । नेपालको बाह्य आर्थिक अवस्था सुरक्षित र अत्यन्तै मजबुत स्थितिमा पुगेको छ। चालु आर्थिक वर्षको आर्थिक सर्वेक्षण २०८२/८३ अनुसार देशको बाह्य क्षेत्रलाई बलियो बनाउन विप्रेषण आप्रवाह (रेमिट्यान्स) र विदेशी विनिमय सञ्चितिको अवस्था यस वर्ष निकै उत्साहजनक र सन्तोषजनक रहेको छ।
विदेशी मुलुकहरूमा रोजगारी तथा व्यवसायमा रहेका नेपालीहरूबाट भित्रिने रेमिट्यान्समा निरन्तर वृद्धि भएका कारण देशको भुक्तानी सन्तुलन (ब्यालेन्स अफ पेमेन्ट) बचतमा रहेको छ। यसैगरी, रेमिट्यान्सकै जगमा नेपाल राष्ट्र बैंकसँग रहने विदेशी विनिमय सञ्चितिमा समेत उल्लेखनीय सुधार आएको छ, जसले मुलुकको वस्तु तथा सेवा आयात धान्न सक्ने क्षमतालाई उच्च स्तरमा पुर्याएको छ।
बाह्य क्षेत्रमा कायम भएको यो स्थायित्वले देशको अर्थतन्त्रलाई सम्भावित अन्तर्राष्ट्रिय झट्काहरूबाट जोगाउन सुरक्षा कवचको काम गरेको छ। पर्याप्त विदेशी मुद्राको मौज्दात कायम रहँदा मुलुकभित्र ठूला पूर्वाधार निर्माणका सामग्री आयात गर्न र वैदेशिक लगानी भित्र्याउन थप सहज वातावरण बनेको सर्वेक्षणले औंल्याएको छ।
अर्थ चाैतारी ।
